ZORAM TODAY| Aizawl June 7th, 2024 (Fri): Vawiin khan Mizo Hnam rûn chhung inkhawm neih a  ni a. Hun hnihnaah AMC ward No. XIX bye election neih tura Candidate puanna neih a ni. Lalrinenga Sailo, Mayor, AMC chuan Dr. Lalrinzuali Hrahsel D/O Dr.Z.R Thiamsanga chu MNF official candidate atan a puang a, Upa Denghmingthanga, Adviser chuan candidate hlanna hun hmangin Women Front leh MNF municipal Corporator ten duhsakna pangpar an hlan bawk a ni.

He hunah hian Zoramthanga, MNF President chuan thusawina neiin, AMC bye election a search committee-in uluk taka a zawn hnu a candidate ṭha tak leh rintlak tak mai MNF-in a nei ta chu lawmawm a tih thu a sawi a. "MNF party chu Pathian  leh kan ram tan ti tu kan nih angin Pathianin kum 63 min lo hruai tawh a, min la hruai zel dawn a, ṭul a tih leh kan tling leh ang a, ṭul a tih loh leh kan tla mai ang," a ti. 

Zoramthanga chuan MP thlan chungchang sawiin,  Pathianin min thukru rih a, Inpuhmawhna zawng lova Pathian remruat a pawm a, Pathianin engnge min hrilh a, min zirtir a tum tih chhut zawk turin Party mite a fuih. Pu Zorama chuan ZPM party chungchang sawiin, tun MP inthlana vote tla a ṭhat theihna tura mipui zirtir nan sorkarin cheng nuai 58 chuang a seng a. Chutih laiin Police sâng chuang vote thlak thei lova siam an ni leh si hi a vanduaithlak hle a. Sorkar inthlahdah vang liau liau a ni, a ti.

MNF Sr Vice President Dr.R.Lalthangliana pawhin thu sawiin AMC hi MNF kutchhuak a ni a, State Information Commission pawh hi North East a a hmasa ber atan 2007 chho a MNF din a ni, a ti a. "AMC bye election atan candidate ṭha tak kan nei a; kan corporator te leh general headquarter lam pawhin theihtawp kan chhuahpui dawn a ni," a ti bawk. MP election-ah pawh ṭum dang ang lo tak a opposition party te ṭangrual lova a mal a kan ding chungin Congress nen a kan vote share belhkhwm chuan vote sing thum chuangin ZPM candidate kan khûm a ni, a ti bawk.

Dr. Thangtea chuan, engkim tan hun ruat a awm a ni tih pawm a, Pathian dah hmasaa Pathian leh kan ram tan a ti kan ni tih theihnghilh lo turin MNF mipuite a chah a. "Kan hma lawka MDC leh LADC, SHC, LC leh VC inthlan lo awm turah, theihtawp chhuah chhunzawm turin party mite ka ngen a ni," a ti.

He hunah hian AMC ward No. XIX by election lo awm tur a candidate Dr.Lalhriatzuali pawhin thusawiin, bial mipui te ṭawngṭaipuina, ṭawiawmna leh khawngaihna vote a ngen nghal bawk. 

Mizo Hnamrûn chhung inkhawm hi Tawnluia, NCC, MNF General Headquarter chuan kaihruaiin, TC Kaphmingthanga, GS, MNF General Headquarter chuan hunserh a hmang.